Skip to main content

ASD-Afdeling

Langerugskool

Outisme-afdeling

Die Outisme-afdeling akkommodeer leerders met Outisme. Hierdie afdeling volg nie die KABV-kurrikulum nie. Leerders ontvang onderrig op grond van Individuele Ondersteuningsplanne (IOP’s). Dit beteken dat leerders onderrig en ondersteun word volgens individuele vlakke van funksionering.
Langerugskool

Individuele Ondersteuningsplanne

By Langerugskool se Outisme-afdeling word leerders ondersteun en ontvang hul onderrig op grond van ‘n Individuele Ondersteuningsplan (IOP).
  • Onderrig in klasverband wissel van akademie tot vaardighede volgens belangstelling en funksioneringsvlak.
  • Elke leerder volg sy/haar eie IOP (Individuele Ondersteuningsplan).
  • Daar word spesifiek gefokus op die aanleer van sosiale vaardighede.
  • Selfhelp en lewensvaardighede is deel van die ondersteuningsplanne.
  • Positiewe kommunikasie tussen ouers en die opvoeder geniet prioriteit.
  • Maksimum voordeel word geput weens kleiner klasgroepe – maksimum nege – met hulpverlening deur ‘n assistent.
  • Onderrig vind een-tot-een plaas, asook gesamentlik tydens groepsaktiwiteite.
  • Die leeromgewing is gestruktureerd.
  • ‘n Streng roetine word gevolg.
  • ‘n Afkoelperiode en sensoriese breke word toegelaat wanneer `n leerder dit nodig het.
Langerugskool

Aansoeke

Al die aansoeke na Langerugskool word via die Departement van Onderwys se verwysingsisteem gedoen.
U moet dus soos volg te werk gaan:
1

Maak `n afspraak met u kind se klasonderwyser/skoolhoof en verduidelik dat u graag wil hȇ dat die skool u kind na Langerugskool verwys. Neem afskrifte van alle verslae wat u van `n kind het saam.
2

Die moontlike verwysing word dan deur die skool se SGOS bespreek.
3

Die SGOS van die skool kontak dan die betrokke DGOS van die distrikskantoor. Die DGOS (sielkundige, leerondersteuner en/of maatskaplike werker) sal dan die skool besoek en die SGOS ondersteun met die moontlike aansoek en nodige assesserings indien van toepassing.
4

Aansoeke vir die Outisme-afdeling (Individuele Ondersteuningsplanne) word deur die Kaapse Wynland Distrikskantoor na Langerugskool gestuur om op die skool se databasis geplaas te word. Plasing in die Outisme-afdeling is onderhewig aan `n observasietydperk en ook plek in `n bepaalde klas. Die ouers word deur die skool gekontak sodra `n Outisme-uitreikspan van die Departement van Onderwys `n observasie kan kom doen en daar plek is vir nuwe plasings. Die voornemende leerders word dan by `n siftingsvergadering voorgelê en die ouers word daarna deur die skool gekontak om die bepaalde uitkoms te bespreek.

Indien u kind nie tans in `n skool is nie en/of tuisonderrig ontvang, moet u asseblief kontak maak met die GLOO-afdeling van die Kaapse Wynland Distrikskantoor. U kan die Kaapse Wynland Distrikskantoor kontak by 023 348 4600 om met die Hoof van die GLOO-komponent of Senior Sielkundige in verband hiermee te gesels.

Langerugskool

Kriteria vir toelating

  • ‘n Diagnose van outisme is nodig.
  • Die leerder moet van skoolpligtige ouderdom wees.
  • Die leerder moet oor ‘n gevestigde toiletroetine beskik.
  • Die leerder moet met ‘n mate van onafhanklikheid kan funksioneer, en hy/sy moenie ‘n bedreiging inhou vir hom- of haarself, of wanneer daar met ‘n ander persoon in interaksie getree word nie.
  • Die leerder moet geen uitermatig destruktiewe optrede of gedrag openbaar nie.
  • Hy/sy moet in staat wees om in ‘n groep te funksioneer.
  • Nabootsingsvaardighede is noodsaaklik.
  • ‘n Sekere mate van intrinsieke motivering is noodsaaklik.
  • Die leerder moet oor die potensiaal beskik om baat te vind by die individuele ondersteuningsplan en -program wat deur die skool aangebied word.
  • Leerders tussen ouderdomme 12 jaar tot 16 jaar sal slegs oorweeg word indien hul reeds in `n skool is.
  • Onderhewig aan die beleid van Langerugskool.
Praktiese faktore, eie aan die omstandighede van die skool, moet in ag geneem word by die toelating van leerders.
Dit sluit die volgende in:
  • Personeelvoorsiening in die skool;
  • Redelikerwys ruimte (klaskamer), fasiliteite en ander hulpbronne om die leerder te akkommodeer en in sy/haar opvoedkundige behoeftes te voldoen.

Besoek gerus ook die volgende afdelings

Ondersteuningsdienste
Buitemuurs